Ai timpi dei ani del splendor dela fortessa de Maràn, i confini del territorio i vigniva sorvegliài dal corpo dei militari comandài da un Capitàn, par paura de le invasiòn de la zènte de fora.

Ani indrio, Aquileja la comandeva squasi duto el Friuli, la fortèssa de Maràn, el forte de Porto Buso, l'isola de Sant'Andrea par via de mar, e Strassoldo, Tore de Zuìn e altre par via tèra. E cussì se tignìva sorvegliài i cunfini. Dopo el 1513 gà fato cussi anca i Imperiài.

In tel 1559 el duca Guidobaldo d'Urbino el gèra stò par la seconda volta mandò so le terre del Friuli con la carica de perlustrà i confini de quel che comandèva Venèssia e par fà duti i preparativi par podè difendese se vignìva qualchi attacco da parte de foresti. E cussi la fortèssa de Maràn, Porto Buso e la caserma vecia de Sant' Andrea le vèva sempre tanti soldati. Cussì x è stò fin in tel 1776. Dal secolo scorso al posto de i militari x è vignùe le Finanse. Quele de Marina le tigniva a bada el palùo con un mototopo: una batèla con tanto de pansa che la navigheva a rimi. Le xè stàe in sarvissio fin in te11969.

I confini i gèra sorvegliài dal corpo de tèra. I gèra vestii griso-virdi con tanto de capèl con la piuma come i alpini e no' con la visiera come che i xè ancùo.

In tempo de pase le Finanse le sorveièva el palùo e i dinturni e le stèva in sìe caserme. La prima la se trovèva a Maràn, in piassa dei Orti, al secondo piàn de una granda casa tacàda ale mure de la fortèssa, dove che dèsso xè la fabbrica. Là gèra dièse finanse con a capo un tenente de Marina. La seconda la se trovèva a Porto Nogaro con dièse componinti comandài da un sottocapo de Marina. La tersa, con otto finanse, la gèra in te l'isola de Lignàn tacàda a la sola abitassiòn che quela volta gèra (le prime case le xè stàe fate in tel 1903). La quarta la se trovèva in te l'isola de Sant' Andrea, con sie finanse, sempre del corpo de la Marina. Anca questa la gèra fata de pièra e duto intorno gèra sol che sabbion e qualchi casòn de pescauri. La quinta a Porto Buso con otto eleminti. La sesta la gèra in te l' Aussa-Corno con sìe omini.

Dute queste postassiòn le gèra assistie e collegàe ogni zorno da barcaioli de Maràn che i porteva viveri, acqua, la posta, la roba de visti lavada e stiràda. I dò barcaioli gèra fradèi: un el se ciamèva Piero e l'altro Toni Marani. Quisti, par questo mistièr, in maranese i vignìva ciamài «Tramizèri», cioè «tra-mez- zo» de un posto de riferimento a un altro. I fasèva co' la barca el ziro de dute le caserme par portà de magnà, de vestì e la posta. Cussì ogni quindese zurni d'estàe e una volta al mese d'inverno. I porteva a Maràn dute le divise a lavà e stirà. Le vignìva lavàe co' sènere e lissìva e co'la tòla e el mastèl.

Le lavandàie gèra dò brave dòne. Una de queste gèra l'agna Madalena Miloco, quel'altra gèra so' fia, una fioleta che ancuo sarissi la nona Angelina che la xè rivada à centoequatro ani. La nona Angelina, quando che la gerèva zòvene la fasèva anca le pulissie in tel posto andove che gera la postassiòn de Maràn, in te la fabbrica de 'desso. El comandante, tenente de Marina, quando che el xè andò trasferio in un altro posto, el volèva portala via con elo, ma la mare dela Angelina no' la gà volesto.

El mistièr dei Tramizèri lo gà fato altri omini de Maràn dopo tanti ani de quìì primi dò. Un de quisti el se ciamèva Toni Catre, un altro Moro, so misièr de l'Empi, che l'abiteva a Lignàn. Dopo Toni Catre x è vignùo Barba Riccardo, nono del Fabio chel fà el pustìn. In tel 1903 i xè stài ingaggiài da sior Anzolo Marin, da so' fradèl e da so' sorela. Quisti siùri i abiteva in tel palasso dei Provvedituri che xè in piassa.

I trami zeri i veva al compito de portà mudùni co' la batela par costruì l'albergo Marin che el xè ancora 'desso a Lignàn Sabbiadoro. In quel tempo gèra la prima costrussion dopo la caserma de le finanse. Sior Anzolo Marin ogni tanto el se faseva portà a Lignàn da luri par vede come che andeva i lavuri. Un zorno el gà volesto par forsa andà a vede. I tramizèri i ghe gà dito de no' andà parchè no' se podeva dismontà: no' gèra banchine come 'desso, ma duto malamentre con tanto de sabbiòn e fango. Ma lu el gà volesto andà lo stesso. Quando i xè rivài a Lignàn, el problema gera come dismontà e dicargà la roba. Alora sior Anzolo el ghe ga dito al Moro de portalo in tera sensa faghe bagnà le gambe. Par el Moro, de portà la roba, mudùni, roba de magnà, pài e duto el resto, gèra un conto, ma a vè un tòco de siòr in sima le spàle gèra un'altra roba. Apèna sto' Sior el xè montò so le spàle, un poco par l'emosiòn, un poco par el peso, i gà fato un bel bagno completo dutie dò. Ancora el zorno de ancuo la conta a qualchidùn.

Quisti tramizèri i gà fato sto' mistièr fin vissìn la seconda guera mondial. Un per de volte lo gà fato anca l'Empi Filipo.

In tel 1885 un forte sirocàl el se gà scatenò in palùo. Se gèra al dò de otobre. Duti i maranìsi pescauri i se troveva fora par le peschere a mete a posto i grasiùi par le saràje. A un momento xè rivò una caligàda de quele brute. Xè andò a tòrio duti i grasiùi. Dute le barche le xè andàe a fundi de acqua par massa piova e vento. I gà dovesto andà a rifugiàsse so la caserma de le Finanse de Sant'Andrea. Con duto stò diluvio no' xè scampò el morto; e i pescaùri, parchè che i gà vesto salva la vita i ghe gà dedicò a la Madona de la Salute un quadro par ricordà 'sto fato. Ancora ancuo el quadro el xè esposto in Cesèta. Dute 'ste caserme le xè stàe ferme al suo posto, con qualche variassiòn specialmente a Lignàn, dove che le se gà ingrandio insieme co' lo sviluppo del paese, sensa più dipende dal comando de Maràn. Dopo la seconda guèra mondiàl i gà tirò via le finanse in te l'isola de Sant' Andrea, in te l' Aussa-Corno e a Porto Buso lassando sol el triangolo de le postassiòn de Maràn, Lignàn e Noghèr. A Lignàn le finanse le xè stàe squàsi sempre de Marina e le andèva pal palùo co' la batela a rimi. Quele de Maràn, de Buso e de Sant' Andrea no' le gà mai usò i mutùri parchè quando che x è vignùo el progresso x è stada tiràda via la finansa de Marina. 'Desso in tèra x è le macchine e quele che x è in mar le x è dotàe de moderne imbarcassiòn. Le gà de fà i controlli anca a le barche che le pesca in altomàr. I tramisèri i gà finìo el so lavor, i x è andài in pensiòn; ma i ne gà lassò un grando insegnamento: anca se i veva de andà avanti fasèndo tanta fadiga coi rìrni, no' i gà mai rinunciò al so' lavor. El progresso el gà fato sparì el mistièr dei trarnizèri. Ancuo le distanse no' le x è più tanto grande par merito dei mutùri. Par questo anca naltre vemo de butà via i cunfini; vèmo de lassà libero spassio par volèsse ben come fradèi e jutàsse come se fussimo duta 'na famèja sola. Questo gà de gesse la Pasqua del nuvantaquattro.

Claudio Damonte